PILAR CAPIZ – Anay surrenderee sa ila nga lugar, ang isa ka lalaki nga nadakpan matapos makuhaan sang indi lisensyado nga armas luthang sa Barangay Rosario, Pilar, Capiz.
Matandaan nga ginkilala ang nadakpan kay alyas ‘Jude’, 31-anyos kag residente sang Barangay Bulaquena, Estancia, Iloilo.
Sa interview sang Bombo Radyo sa hepe sang Pilar Municipal Police Station nga si PMaj. Alfred De Leon, ginpahayag sini nga posible nagadul-ong sang illegal nga droga ang nadakpan sa ila lugar ilabi na nga sang nadakpan ini bisperas sang ila fiesta sa banwa.
Suno kay De Leon, sa ginpatigayon nga test nagpositibo ini nga nagagamit sang illegal nga droga.
Makabig man suno sa hepe nga ang nasambit nga persona bilang Street Level Individual (SLI).
Mahibaluan nga narekober sa nadakapan, ang isa ka unit sang Smith and Wesson .38 caliber revolver nga armas luthang, 2 ka mga bala kag isa ka basiyo.
Dugang nga nakuha sa posesyon ang 2 ka sachets sang ginapatihan illegal nga droga nga may kabug-aton 10 gramos kag may Standard Drug Price nga P68,000.00.
Magapangatubang ini sa kaso nga Republic Act 10591 ukon Comprehensive Firearms and Ammunition kag Regulations Act 9165 ukon Comprehensive Dangerous Drugs Act of 2002.
Sa karun, nagapabilin ini sa kustodiya sang Pilar MPS para sa nagakaigo nga disposisyon.
