Pilason ang isa ka lalaki matapos ginalegar ginluthang sang security guard sa Sitio Uno, Barangay Lawaan, Roxas City.
Ang biktima amo si Elorde Albao Jr., 26-anyos, kag residente sang Estancia, Iloilo kag ang ginaalegar nagpangluthang amo si Jomar Segere, 26-anyos kag residente sang Panay, Capiz.
Sa interview sang Bombo Radyo kay Police Lieutenant Colonel Ricardo Jomuad Jr, Hepe sang Roxas Component City Police Station, iya ginpahayag nga ‘las dos sang kaaganhon, may nabaton sila nga report kun sa diin may yara ang nabiktima sang hit and run gani gilayon nila ini nga ginpadulungan.
Suno kay Police Lieutenant Colonel Jomuad Jr., sang pag-abot nila sa ospital, didtu nahibaluan nga biktima sang pagpangluthang ang nasambit nga lalaki nga yara man sa impluwensya sang makahulubog nga ilimnon.
Sa pahayag naman sang security guard, nahibaluan nga nagalakat sa dalan ang biktima kag nagasinggitan gani gin-sita niya apang nagpanghaboy ini sang bato gani napilitan ini nga magwarning shot.
Naka-angkon sang minor nga pilas ang biktima nga yara na sa estable nga kondisyon.
Dugang pa sang natungdan, lunsay nagpirma sang affidavit of non-interested ang duha ka bahin gani gina-konsidera na nga ‘case closed’ ang amo nga insidente.
