JAMINDAN CAPIZ – Pilas ang naangkon sang isa ka lalaki, matapos ginapahayag ginbuno samtang naga-date kaupod ang iya nobya sa Barangay Poblacion, Jamindan Capiz.
Ginkilala ang biktima kay alyas “Aron”, 20-anyos residente sang Barangay Baye-baye samtang ang ginatudlo mga suspek amu sanday alyas “Nilo”, 23-anyos, alyas “Joven”,18-anyos kag tatlo ka mga wala na ginpanghingadlan nga mga menor de edad nga lunsay mga residente sa amu nga lugar.
Sa interview sang Bombo Radyo sa Officer In Charge sang Jamindan Municipal Police Station nga si PCpt. Peter John D. Celino, ginpahayag sini nga samtang nagapungko sa higad sang suba ang biktima kaupod ang iya nobya, hinali lamang nag-abot ang suspek kaupod ang apat sini ka mga abyan.
Suno kay PCpt. Celino, wala nagdugay may nagluntad nga indi pag-intindihanay sa tunga sang biktima kag mga suspek kung sa diin gulpi lamang nga naghugot sang kutsilyo si alyas “Nilo” kag ginbuno ang biktima nga naigo sa likod nga bahin.
Dugang pa sini nga matapos ang pagpangbuno, ginpulihan pa ini sang tapungol ang biktima.
Mahibaluan nga yara sa impluwensya sang makahulubog nga ilimnon ang mga suspek sang natabo ang insidente.
Ginpahayag man ni Celino nga anay hiligut-anon ang ginalantaw nga rason sa pagpangbuno kag posible pagpangimon.
Sa karun, padayon nga nagapaayo ang biktima sa naangkon sini nga pilas sa magkatuhay nga parte sang lawas.
Samtang ginalalip naman sang mga otoridad ang nasambit nga apat pa ka nga mga suspetsado para sa nagakaigo nga disposisyon matapos nga madakpan ang isa sa mga ini.
