Lalaki pilason matapos makabunggo sang layaw nga ido ang ginamaneho nga motorsiklo sa Barangay Banica

ROXAS CITY – Pilason ang isa ka 33-anyos nga driver sang motorsiklo matapos nga ginaalegar nga nakabunggo sang layaw nga ido sa Barangay Banica, Roxas City.

Ginkilala ang biktima nga si Teddy Besana sang Barangay Sibaguan sining siyudad.

Base sa inisyal nga imbestigasyon sang Roxas City Police Station nga samtang ginasubay sang biktima ang dalanon sakay sa iya nga motorsiklo hinali na lamang nga may nagtabuk nga layaw nga ido rason nga natumba ini sa iya nga motorsiklo.

Bangud diri, nag-angkon sang pilas sa lawas ang nasambit nga biktima nga gilayon naman ginrespondehan sang Capiz Emergency Response Team ukon CERT agud dal-on sa ospital kag dapatan sang nagakaigo nga pagbulong.