Nabatyagan mu man bala kun kaisa nga daw kaangay wala na sang may labot sa imu ang imu pamilya kag mga abyan?
Pinasahi ang ginhimo sang isa ka content creator sa pungsod Belgium bangud ginpeke lamang sini ang iya kamatayon agud mahibaluan kun may matuod gid man bala nga nagapalangga sa iya.
Ang nasambit nga lalaki amo si David Baerten ukon mas kilala sa social media bilang si Ragnar le Fou kun sa diin kaupod sini nga nag set-up sang amo nga prank ang iya asawa kag anak kag sila man mismo ang nagpalapta sa social media hanungod sa peke nga pagkamatay sini.
Bangud sini, gintambungan ang nasambit nga peke nga lubong sang masobra isa ka dosena nga mga indibidwal kag samtang nagakasubo ang mga tawo, naghugpa ang isa ka helicopter nga ginkakibot man sang kadam-an bangud nakita nila si David.
Gintamyaw pa ini niya suno diri ang mga tawo sang ‘Welcome to my Funeral” kung sa diin nanari-sari nga mga reaksyon ang iya nabaton.
Ginklaro man sini nga ginhimo niya ang amo nga prank indi agud makakuha sang kwarta ang amu nga content, kundi agud magaserbi nga mensahe kag mapaminsar sang kadam-an nga indi na paghulaton nga mapatay pa ang isa ka tawo agud liwat ipakita kun ano mo ini kapalangga.
