Landscapper nasapwan nga patay sa ginatrabahuan nga construction firm

ROXAS CITY -Isa na ka mayami nga bangkay ang landscapper sang masapwan sang mga kaupdanan sini sa welding area sa sulod sang Rock 101 compound kaina sang aga.

Ginkilala ang biktima nga si Gary Buaron 43-anyos alyas muslim sang Barangay Linampungan, Pontevedra, Capiz.

Suno kay Wilfran Gonzales, kaupod sang biktima nga antes nasapwan sini nga aga ang bangkay ni Buaron, tuman ini ka hubog kagab-i.

Ginsakwat pa nila ang biktima pakadto sa iya ginatulugan agud makapahuway na ini sa kahulugbon.

Apang nanotisyahan sa pagpukaw sa biktima sini nga aga para magpamahaw nga wala na ini nagahulag kag matig-a na ang lawas.

Ginapatihan nga ginbangungot ang biktima rason nga wala na ini nakabugtaw.