ROXAS CITY – Ginahikot sa karon sang Municipal Social Welfare and Development Office (MSWDO) ang nagakaigo nga rekisitos agud mapahamtang sa nagakadapat nga puloy-an ang lapsag nga lalaki nga gin-abandonar sang iya Iloy sa kasagingan sa Barangay San Nicolas, Pilar, Capiz sadtong Marso 28, 2023.
Sa interview sang Bombo Radyo kay Ms. Judith Bernales, pinuno sang MSWDO-Pilar, ginpahayag sini nga madamo sang kinahanglan nga rekisitos kag isa na diri ang live birth nga ginahitso nila agud mabalhin na sa orphanage ang lapsag kag agud mangin bukas sa kun sin-o man ang luyag nga mag-adoptar.
Ini bangud wala pa tubtob sa karon sang napamatud-an nga ginikanan sang lapsag, matapos nga ginpanginwala sang isa ka babayi nga ginsuspetsahan nga siya ang Iloy sang bata.
Apang sa tion nga magatuhaw gid man ang Iloy sang lapsag, indi man ini madali-dali hatag sa iya bangud isa ka criminal offense ang iya ginhimo nga pag-abandonar sa iya kaugalingon nga bata.
Bukas man ang lapsag para sa adoption, kag ginpahayag ni Bernales nga indi sa ila lebel sa munisipyo ang pag-aprubar, kundi sa Regional office sang DSWD, gani kinahanglan nga mag-apply sang lisensiya ang luyag mangin foster parent sang lapsag.
Sa karon, ginpahamatangan ni Mayor Arnold Perez sang temporaryo nga hulot kag kinahanglanon sang amu nga lapsag, may yara man sang nagadonar nga kagamitan, samtang ginaproseso ang nagakaigo nga dokumento sini antes iga-transfer sa Bacolod City sa isa didto ka orphanage.
