Ginapaidalom na sa imbestigasyon sang mga otoridad sa South Korea ang pagkapatay sang isa ka lapsag nga ginbun-ag sang wala sa oras sa isa ka Jeju Air flight nagikan sa Clark, Pampanga padulong sa Incheon.
Sandig sa mga report sang Korea Joong Ang Daily kag Yonhap News Agency, ginbun-ag ang lapsag nga lalaki sa katunga-tungaan sang biyahe sang Dominggo sang aga, apang nasapwan nga wala na gaginhawa.
Gilayon ini nga ginpadangat sa ospital pagkatapos sang emergency landing, apang gindeklara nga patay na. Samtang, ginkilala ang iloy nga isa ka Pinay nga yara sa edad nga 30, nga kaupod sa biyahe ang asawa sini, ugangan, kag bata nga babaye, suno sa Korea Herald.
Suno sa pulisya, may hurisdiksyon sila sa kaso bangud natabo ini sa sulod sang eroplano nga rehistrado kag may flag sang South Korea.
Padayon naman ang imbestigasyon sang mga otoridad agud matumod ang sitwasyon sang pagkabun-ag kag taliwan sang nasambit nga lapsag.
