ROXAS CITY – Ginkumpirmar ni Liga ng mga Barangay President kag SB Member-elect Rogelio Besorio sang Panay, nga gintawagan kag gin-text ini ni board member Jonathan ‘Sonny’ Besa, angut sa imbetasyon ni Governbor-elect Fredenil ‘Oto’ Castro nga pakigsinapol sa mga Barangay Kapitan sa ila banwa.
Sa interview sang Bombo Radyo kay Besorio, suno diri nga matuod nga ginlab-ot ini board member Besa kag naghinyo nga imbitaron ang 42 ka mga Kapitan para sa pagsinapol, apang wala ini nagpromisa kag naghatag sang numero sang sigurado nga magatambong nga Punong Barangay.
Nagsiling lang ini nga mahimo gid maka-communicate ang kampo ni Gov-elect Castro kay Mayor-elect Vic Bermejo para sa amu nga initiyatibo, apang wala ini nagpahayag nga magalaong ini anay kay Bermejo antes ang imbetasyon.
Matandaan nga nakanugonan si Besa para sa banwa sang Panay matapos nga sa 42 ka mga kabarangayan, 11 lang nga mga Kapitan ang nagsapol sa magapungko nga Gobernador agud hinalaan ang posible programa sa ila banwa.
Ginpahayag man ni Besa sa nauna nga interview sang Bombo Radyo nga wala ini sang intensyon nga bastuson si Bermejo, matapos nga wala diri gindiretso ang imbetasyon, sa baylo ginpaagi sini sa Liga President agud makasiguro nga mahibaluan sang tanan nga Kapitanes.
