ROXAS CITY – Magapatigayon sang training kag seminar ang Land Transportation Office (LTO) para sa PNP kag TMU personnel agud mangin otorisado sa pagkumpisakar sang mga driver’s license sa mga motorista nga nagalapas sa layi.
Sa pakig-angut sang Bombo Radyo kay Mr. Gonzalo Andrada Jr. pinuno sang Traffic Management Unit (TMU) ginkumpirmar sini nga magapaidalum sa training ang napulo sini ka personnel kag napulo man sa PNP.
Ang nasambit nga lihuk ang kadungan sang ginpapanaug nga memorandum circular sang Department of Interior and Local Government (DILG) nga indi na mahimo makakumpiskar ang mga personnel sang TMU sang lisensya sang mga driver nga nagalapas sa layi.
Suno kay Gonzalo, sa baylo, kinahanglan na lang sang TMU mag-isyu sang tiket sa mga nagabayolar apang kun makumpleto na sini ang 2 ka adlaw nga seminar sang LTO agud mangin deputized agents mahimo na sini makumpiskar ang lisensya sang isa ka driver.
Nagalaum naman si Gonzalo nga mangin madinalag-on ang amu nga tikang santu sa direktiba sang DILG.
