ROXAS CITY-Dismayado ang pila ka mga magagmay nga mga mangingisda natuhoy sa madata sa gihapon nga operasyon sang mga sakayan nga nagapatigayon sang iligal nga pagpangisda sa kalalawran nga sakup sang siyudad kag probinsiya.
Sa interview sang Bombo Radyo sa chairman sang City Fisheries Aquatic Resources and Management Council nga si Mr. Ronilo Combate, ginpahayag sini nga tuman na kadata ang pagpatigayon sang iligal nga pagpangisda sa kadagatan nga tubtob subong wala pa sa guihapon nasolusyonan sang gobyerno.
Ginkwestion sini ang operasyon sang Bantay Dagat Task Force sang siyudad nga madugay na nga wala sang may nadakpan.
Suno kay Combate nga ginapabay-an lang sang Bantay Dagat kag wala ginadakup ang mga iligalista sa kalalawran.
Kasubong man nga ginbalewala lang sang mga otoridad ang ginpapanaog nga Fisheries Administrative Order No. 167 ukon closed season bangud madamo sang mga iligal nga nagapangisda ang naglapas sa amo nga layi.
Samtang nagpanawagan sa karon ang mga marginal fisherfolks kay Roxas City Mayor Ronnie Davidas kag Capiz Governor Esteban Evan Nonoy Contreras nga hatagan sang dugang nga atensyon ang problema sa kadagatan.
Dugang pa sini nga gutom na ang mga magagmay nga mga mangingisda bangud halos tanan nga hulik ang yara sa mga dalagkuan nga mga sakayan.
