ROXAS CITY-Patay ang duha ka mga lalaki matapos nga natumba ang motorsiklo sa dalan kag aksidente nga malapakan ang mga ulo sang Ten-Wheeler truck sa National Highway sang Barangay Atiplo, Mambusao Capiz.
Ginkilala ang mga napatay nga sanday Aldren Delmindo 44-anyos kag Vicente Caporal 27-anyos lunsay mga residente sang Barangay Parian, Sigma Capiz.
Sandig sa inisyal nga imbestigasyon ni Police Staff Sergeant Johny Delos Santos ginkompirmar sini nga lunsay yara sa idalom sang impluwensiya sang makahulubog nga ilimnon ang duha ka mga napatay matapos nga nag-inom sa Barangay Bato-Bato sa nasambit nga banwa.
Suno sa kay Delos Santos nga nagapapauli na ang duha ka mga persona sang aksidente nga natumba ang ila ginasakyan nga motorisiklo sa dalan matapos nga nag-overtake sa sa ginasundan nga truck.
Matapos nga natumba sa dalan, ginpahayag ni Delos Santos nga tumabog ang duha mga biktima kag nagsa-ug sa idalom sang Ten-wheeler truck nga ginamaneho naman ni Revel Roa, 44-anyos residente sang Barangay Laboon, Maasin City, Southern Leyte.//
Ginkompirmar naman ni Delos Santos nga nalapakan sang goma sang truck ang ulo sang duha ka mga biktima.
Gindala pa sa Mambusao District Hospital ang duha ka mga biktima apang gindeklarar nga dead on arrival.
Sa karon nagapadayon pa sang imbestigasyon sang Mambuso Municipal Police Station agud matul-id kun sino sa duha nga napatay ang nagamaneho sang nasambit nga motorsiklo.//
Yara naman sa kustodiya sang mga kapulisan ang driver sang truck agud sa dugang nga imbestigasyon.
