ROXAS CITY – Wala na sang kabuhi sang ginpadangat sa ospital ang mga biktima nga sanday Roger Concepcion 61-anyos kag anak sini nga 16-anyos nga solterito makaligad nga makuryente sa Barangay Calaan , Panitan, Capiz.
Ba-se sa inisyal nga pagpangusisa sang mga katapo sang Panitan Municipal Police Station nga nasapwan na lamang sang bata sang biktima nga si Roger ang amay kag utod sini sa guwa sang ila balay nga nagahuray-ad kag wala na sang kabuhi.
Ginapatihan nga posible nakuryente ang mga ini bangud lunsay may yara sang nakita nga sunog sa ila mga kamot.
Sa pihak nga bahin, patay man ang isa ka anum ka tuig nga bata nga babayi matapos nga aksidente nga nauyatan sini ang live wire nga naga-angut sa electric motor rason nga ini ang nakuryente.
Ginapahayag nga ang nasambit nga anum ka tuig nga bata ang himata man sang mag-amay nga una na nga ginbawian sang kabuhi bangud sa pagkakuryente kag residente sang amo man nga barangay.
