Wala ginsapak sang Malacañang ang panawagan ni Vice President Sara Duterte nga magpaidalom sa drug test si Presidente Ferdinand Marcos Jr.
Suno kay Palace press officer Claire Castro nga bisan si anay Presidente Rodrigo Duterte ang wala nagtuman sa kasubong man nga pangabay sa sulod sang anum ka tuig nga termino sini.
Dugang pa sini, nga una na nga ginpahayag ni anay Presidential spokesperson Harry Roque nga indi mahimo nga mandoan ang Presidente sang pungsod nga magpaidalom sa drug test.
Madumduman nga sadtong Agosto 2018, ginbasura ni Roque ang panawagan ni anay Senador Antonio Trillanes IV nga magpaidalom sa drug test si Duterte kag ang iya pamilya.
Ang nasambit nga panawagan ang nag-abot matapos nga gin-ako ni Duterte nga nagagamit siya sang marijuana agud magpulaw nga iya ginbawi sang ulihi.
