DUMARAO – Patay ang manghod samtang pilason naman ang magulang sini matapos nga ginlabu sang ila kaugalingon nga amay sa Sitio Ulang, Barangay Sibariwan, Dumarao, Capiz.
Ginkilala ang napatay nga si Michael Sulleta 30-anyos, residente sang nasambit nga lugar samtang ang pilason nga magulang ang ginkilala nga si Ricky Sulleta.
Base sa inisyal nga impormasyon nga nakuha sang Bombo Radyo sa Dumarao Municipal Police Station, nahibaluan nga magkaupod nga nag-inom ang mag-utod kag ang ila amay nga si Ricordeo Sulleta, 57-anyos sa balay sang ila himata sang hinali na lamang nagbaisay si Michael kag amay nga si Ricordeo.
Ginapahayag nga ginaagda na nga magpauli sang amay ang anak apang indi magpasugot si Michael.
Bangod sa kaakig sang amay, ginlabu sini ang anak nga si Michael nga naigu sa iya nga ulo.
Samtang napilasan naman sa tiil ang magulang nga si Ricky matapos nga nagtuyo ini nga magtambag.
Gindala pa sa Dao District Hospital si Michael apang gindeklarar ini nga dead on arrival.
Boluntaryo naman nga nagsungka ang amay nga suspek sa mga kapulisan.
