Wala na sang kabuhi sang masapwan ang isa ka mangingisda nga lalaki sa sulod sang Tanod Outpost sa barangay Libas, Roxas City, Capiz.
Ginkilala ang persona kay Rolen Batobatan, 46-anyos, kag residente sang Cadiz City, Negros Occidental.
Sa interview sang Bombo Radyo kay Punong Barangay Jobby Nalica, sang barangay Libas, ginpahayag sini nga natigayon niya nga mahibaluan ang insidente matapos nagpalab-ot sang reklamo ang pila ka mga residente may kaangtanan sa indi maayo nga baho sa lugar.
Bangud sini, gilayon niya ini nga ginpadulungan kag didto nakit-an ang bangkay sang biktima nga nagahigda.
Suno kay PB Nalica, sa ila pagtsekyar sa lugar wala sila sang may nakit-an nga hinganiban nga butang ukon posible rason nga gingamit sa iya kamatayon.
Mahibaluan, nga naga-isahanon nga nagapangabuhi sa syudad sang Roxas ang amu nga persona kag ginapatihan nga yara na sa tatlo ukon apat ka adlaw nga wala na ini sang kabuhi.
Sa karon, padayon ang imbestigasyon sang katapo sang Scene of the Crime Operatives (S.O.C.O) kag mga katapo sang Roxas City PNP agud matumod ang gintunaan sang kamatayon sang nasambit nga persona.
