ROXAS CITY – Hilway na sa karsel sang Dao MPS ang 41-anyos nga suspek sa pagpanglabo sa 38-anyos nga lalaki sa Barangay Agtambi, Dao, Capiz, pasado alas-11 kagab-i, Hunyo 14.
Matandaan nga ginkilala ang biktima kay Renan Elegarle, residente sang Brgy. Mapulang Bato, samtang ang suspek amu si Dante Paja, sang Brgy. Agtambi, lunsay sa banwa sang Dao.
Nahibaluan nga naabtan sang suspek ang biktima sa puloy-an sang iya Iloy, nga ginaalegar maga-utang sang kuwarta, apang may nagluntad nga diskusyon sa duha, rason nga nagluntad ang pagpanglabo.
Na-igo sa abaga kag kamot ang biktima nga gilayon ginpadangat sa Dao District Hospital apang gin-transfer sa RMPH para sa dugang nga pagbulong.
Matapos ang pagpanglabo, ginpahayag nga nagsungka ang suspek sa iya utod nga pulis sa kaiping nga banwa, kag gilayon man nga ginkustodiya sa nasambit nga police station.
Apang matapos ang reglementary period of detention sang suspek, natigayon ini nga makaguwa subong nga adlaw.
Sandig sa mga kapulisan, may inisyal na nga pag-istoryahanay sa magtimbang nga kampo agud mag-areglo.
