Makahalanusbo ang natabo sa isa ka manunudlo matapos nga ginluthang sang iya kaugalingon nga estudyante sa sulod sang ila campus sang Balabagan Trade School sa Barangay Narra, Balabagan, Lanao del Sur.
Base sa mga otoridad, nag-umpisa ang pagpangluthang sa biktima nga si Danilo Barba, 34 anyos matapos nga ginhatagan sang lagbong nga grade ang isa ka subject ni Alias Kaizer, 20-anyos kag Grade 11 student.
Suno sa Balabagan Municipal Police Station, mismo ang suspek ang nag-ako sang krimen nga iya nakomiter bangud naakig ini sa manunudlo nga naglagbong sa iya.
Base sa imbestigasyon, natabo ang insidente mga alas 8:00 sang aga sang Agosto 4, 2025.
Hana na kuntani nga magsulod sa campus si Barba sang ginpunggan ini sang suspek kag gintiro sa ulo gamit ang caliber .45 pistol nga gintunaan sang iya instant death.
Matapos ang krimen, nagpanago ang suspek sa mga himata sa Marogong. Apang sa bulig sang iya utod nga lalaki, isa ka pulis, boluntaryo siya nga nagsungka sa mga awtoridad pagkasunod nga adlaw.
Ginapahayag nga indi lamang ang biktima nga isa ka manunudlo ang naglagbong sa suspek kag may iban pa ini nga mga manunudlo nga posible target, apang gin-athag sang suspek nga may kaakig lang siya kay Barba.
Sa subong, may mga pulis kag suldado nga na-assign nga magbulig sa pagbantay sa eskwelahan.
