ROXAS CITY – Ini ang matigdas nga pahayag ni Governor Fredenil “Oto” Castro may kaangtanan sa pagsuspendi sa operasyon sang quarry sa bug-os nga probinsya sang Capiz.
Pahayag ni Castro, wala sang tagipusuon ang mga quarry operator bangud ginpabay-an nila nga maka-eksperensya sang gutom ang ila trabahor kun sa diin klaro man nga nakasaad sa executive order nga ginpirmahan sini nga mahimo maka-apply sang temporary permit ang mga quarry owners agud makapadayon sang operasyon apisar may yara sang suspensyon.
Apang, wala sang mga operator ang nag-apply sang temporary permit ukon special permit.
Suno kay Castro, wala ginpanumdom sang mga operator ang kahilwayan sang ila mga trabahador bangud sa tuman ka peligroso nga ubra.
Gintuad pa sang opisyal nga indi sini masarangan nga makita nga linibo nga mga indibidwal ang mapatay kag malumos tuga sa pabag-o bag-o nga panahon.
Ginklaro sang gobernador nga antes pa mag-isyu ini sang EO, may yara na sang trabaho nga nagahulat para sa mga naga-ubra sa quarry kag indi intensyon sang gobyerno probinsyal nga maekperensya sila sang gutom.
Dugang pa sini nga mahimo na magpalista sa mga kabanwahan ang mga apektado sang pagsuspendi sang quarry para sa programa nga TUPAD sang DOLE kag Cash for Work sang DSWD.
