ROXAS CITY — Nagalaum ang rector sang Immaculate Conception Metropolitan Cathedral kag Vicar General sang Archdiocese of Capiz nga si Msgr. Cyril Villareal nga magapag-on pa ang debosyon sang mga tumuluo sa kay Birhen Maria sang Fatima matapos nga gindeklarar na nga mga santos ang mag-utod nga bata nga sanday Francisco kag Jacinta Marto.
Si San Francisco kag Santa Jacinta ang kaupod sang ila pakaisa nga si Lucia Santos nga ginpakitaan kag ginhatagan sang mensahe sang Birhen Maria sa Fatima, Portugal sadtong Mayo 13, 1917 ukon sukat 100 ka tuig na kagapon nga adlaw.
Gin-kanonisar sila nga mga santos ni Pope Francis sa atubang sang halos milyon ka mga deboto gikan sa magkatuhay nga bahin sang kalibutan sa Fatima shrine complex sa Portugal kagapon.
Suno kay Villareal, nagapakita lamang nga ginkilala sang simbahan ang pagpakita sang Birhen sang Fatima sa amo nga mga kabataan nga bangud sang ila mga birtud sang pagkasimple kag pagkamapainubuson, amo ang iya ginpili nga magdala sang mensahe sa kalibutan.
Nahibaluan nga si Francisco kag Jacinta ang pinakabata nga mga santo nga ginkanonisar sang simbahan nga indi sang mga martir.
Nagapang-edaron pa lamang sadto sang 11-anyos si Francisco samtang 10-anyos naman si Jacinta sang napatay sila bangud sa balatian nga influenza.
Samtang wala na ginkatingala sang rector ang malapnagon nga debosyon sang mga Pilipino sa Birhen sang Fatima.
Suno kay Villareal, ginatawag nga Pueblo Amante Maria ang Pilipinas bangud sa dako nga debosyon kag pagpalangga sang mga Pilipino kay Birhen Maria kag sa madamo niya nga mga titulo.
Nagalaum man siya nga ilabi pa nga magapag-on ang debosyon sang mga Pilipino sa Birhen sang Fatima makaligad nga gindeklarar na nga santo ang mag-utod nga Francisco kag Jacinta Marto.
Nagalaum man si Villareal nga pinaagi sini, tumanon man sa gihapon sang mga tumuluo ang mensahe sang Fatima kaangay sang pagbalik sang tawo sa Diyos, pagbiya sa sala, pagpangamuyo sang Santo Rosaryo kag pag-angkon sang debosyon sa Sacred Heart of Mary.
