Naglab-ot sa 1,163 ang nadakpan sang Philippine National Police (PNP) sa nagkalain-lain nga operasyon sa bug-os nga pungsod humalin Oktubre 31 tubtob Nobyembre 2, kadungan sang pagdumdom sang All Saints’ Day kag All Soul’s Day.
Sa kabug-usan nga 1,391 ka operasyon, 517 sa mga nadakpan ang may outstanding arrest warrants sa nagkalain-lain nga krimen.
Suno sa PNP, lakip sa mga ginpatigayon nga operasyon amo ang batuk sa iligal nga droga (307 ka kaso), iligal nga sugal (223 ka kaso), kag loose firearms (199 ka kaso). Naglab-ot naman sa 151,066.11 grams sang iligal nga druga ang nakumpiskar.
Nakarecord naman sang kabug-usan nga 92,894 ka mga tinawo gikan sa nagkalainlain nga mga ahensya ang ginpahamtang para sa seguridad sang tigkalalag — lakip na ang 32,317 gikan sa PNP, 18,838 gikan sa AFP, BFP, kag PCG, kag 41,739 ka mga force multipliers pareho sang mga barangay tanod kag mga volunteers.
Kaangot sini, nakumpiskar man sang mga otoridad ang 478 ka mga kutsilyo, 65 ka mga botelya sang makahulubog nga ilimnon, 52 ka mga baraha, kag iban pa nga mga ginadumilian sa sementeryo kag mga pampubliko nga lugar sa bug-os nga pungsod.
