ROXAS CITY -Nagakahangawa sa karon ang Department of Labor and Employment (DOLE) Region 6 sa padayon nga nagasaka nga numero sang mga empleyado nga nadulaan sang trabaho bangud sang coronavirus disease (COVID-19) pandemic sa Western Visayas.
Ginpahayag ni Ms. Niezel Sabrido, tagpamaba sang talatapan, nga naglab-ot sa 146 ka establisyemento ang naapektuhan sa rehiyon bangud sang ginapangatubang karon nga pandemiya.
Sa nasambit nga numero, 33 diri ang dalayon nga nagsarado samtang 113 ka mga establisemento naman ang nagpangbuhin sang mga empleyado kun sa diin nagalab-ot sa 1,164 ka mga empleyado ang nadulaan sang trabaho.
Samtang sa probinsiya sang Capiz, 26 tanan ka mga establisyemento ang naaapektuhan bangud sang pandemiya.
Siyam diri ang dalayon nga nagsarado kag 17 ang nagpangbuhin sang empleyado kun sa diin nadulaan sang trabaho ang kapin 192 ka mga trabahador.
Ginpasalig naman sang opisyal nga may yara sang bulig pinansyal gikan sa ahensya para sa mga empleyado nga nadulaan sang trabaho apang nagahulat pa ang DOLE-Region 6 sang guidelines gikan sa central office.
