ROXAS CITY – Kadungan sa pagsugod sang Local Absentee Voting sa bug-os nga Pilipinas, ginatos man ka mga kapulisan sa probinsya sang Capiz ang nagpartisipar sa kaangay nga sahi sang pagboto nga ginhiwat sa Capiz Police Provincial Office sa Camp Apil, Barangay Lanot, sini nga syudad.
Sa interview sang Bombo Radyo kay Atty. Rommel Benliro, City Comelec Officer, ginpahayag sini nga mas o menus 211 ang kabug-osan nga numero sang mga Kapulisan nga nagparehistro para sa Local Absentee Voting (LAV).
Ini ang ginalakipan sang 138 ka mga kapulisan nga iga-pahamtang sa nagkalain-lain nga banwa sa probinsya, kag 73 ka mga katapo sang Mobile Force Company nga nahamtang sa banwa sang Tapaz.
Samtang, sa bahin sang mga suldado, may pagahiwaton man nga separado nga Local Absentee Voting sa Camp Peralta sa banwa sang Jamindan kag wala pa nadala sa nasambit nga numero.
Nahibaluan nga sa bahin sang mga manunudlo, suno kay Atty. Benliro, nga indi kinahanglan nga magparehistro sa LAV, bangud may yara ang mga ini sang privilege voting rights kun sa diin, mahimo gid sila nga makaboto sa iya presinto nga ginaserbehan.
Ginklaro man ni Benliro nga ang pagboto sa Local Absentee Voting ang tubtob National level, buot silingon, humalin Presidente, bise presidente, senador kag party-list lang ang mahimo botohon sang LA voters.
Sa tion nga makaboto ang target LA voters, igadul-ong sa bahin sang nasyunal ang ila balota kag pinsanon nga paga-isipon sa adlaw sang eleksyon sa Mayo 9.
Ang LAV nagsugod subong nga adlaw, Abril 27 kag magatakup tubtob Abril 29, sini nga tuig.
