ROXAS CITY – Yara sa kapin P102,000 ang balor sang ginaalegar shabu nga nakuha sa 2 ka persona nga nadakpan pinaagi sa ginkasa nga drug buybust operation sa Sitio Kassandra, Barangay Punta Tabuc, Roxas City.
Sa impormasyon nga nakuha sang Bombo Radyo sa lugar ginkilala ang mga nadakpan nga sanday Michael Bergantinos, 46-anyos residente sang nasambit nga barangay kag Arnold Clarite, 37-anyos tumandok sang Batan, Aklan.
Sa interview sang Bombo Radyo kay PLt.Col. Francisco Paguia, hepe sang Roxas Component City Police Station (RCCPS), madugay na ginamonitor sang kapulisan ang hulag sang subject person nga si Bergantinos may kaangtanan sa iligal nga droga.
Madugay naman ini nga problema sa barangay kag madamo naman sang reklamo sila nga nababaton natuhoy diri.
Natigayon lamang nga nadakpan si Bergantinos matapos nabaklan sang 1 ka sachet sang ginaalegar iligal nga droga pinaagi sa isa ka pulis nga nagpakuno-kuno nga poseur buyer sa baylo sang P1,500.
Narekober man ang 4 pa gid ka sachet sang ginapatihan shabu nga may kabug-aton nga mas o menus 15 gramo.
Mahibaluan, nga anay napreso na si Bergantinos may kaangtanan man sa iligal nga droga.
Magluwas pa diri, nadakpan man si Bergantinos nga nagahupot sang indi lisensyado nga armas-luthang pinaagi sa gin-implementar nga search warrant sang bulan sang Hulyo apang nakatigayon nga makabayad sang piyansa.
Suno kay Paguia, sa tion nga magguwa ang resulta sang drug test pagapasakaan ang mga ini sang kaso nga paglapas sa Republic Act 9165 ukon Comprehensive Dangerous Drugs Act of 2002.
Sa karon, nagapabilin sa kustodiya sang Roxas City PNP ang mga nadakpan para sa nagakaigo nga disposisyon.
