ROXAS CITY – Padayon nga ginabulong sa ospital ang isa ka matadero matapos nga ginlampusan sang tubo sa ulo sa Barangay Poblacion, Mambusao, Capiz.
Pilas sa ulo ang naangkon sang matadero nga si Francisco Rufino sang ginlampusan sang tubo ni Niño Devedina, lunsay mga residente sang amo nga lugar.
Sa inisyal nga imbestigasyon sang Mambusao Municipal Police Station nagaguwa nga nakaangkon sang away ang duha nga nag-ugat sa daan nga hiligit-anon.
Hinali na lamang nga nagkuha sang tubo ang suspek kasunod ang paglampus sa ulo sang biktima.
Gilayon nga gindala sa ospital ang matadero agud madapatan sang nagakaigo nga pagbulong ang naangkon nga samad.
Samtang nagtuyo pa nga magpalagyo ang suspek, apang gilayon nga nadakpan sang mga otoridad kag karon nakahunong na sa karsel sang Mambusao PNP.
