ROXAS CITY – Gilayon nga nagpatawag sang sinapol si Roxas City Mayor Ronnie Dadivas kasunod sang pahayag sang Department of Health nga may isa na ka kumpirmado nga kaso sang Novel Coronavirus sa Pilipinas.
Liwat nga gintipon sang alkalde ang nagkatuhay nga ahensya sang gobyerno nga ginlakipan sang DILG, PNP, Philippine Coast Guard, opisyal sang Philippine Ports Authority, Civil Aviation Authority Philippines (CAAP), Department of Education (DepEd), health sector, Hospital administrators, response units sang Roxas City Government, Liga ng mga Barangay, agud mas pabakuron ang surveillance, monitoring kag preventive measures sang syudad batuk sa nCoV.
Ginpahayag ni Dadivas nga dapat labi pa nga istriktuhon ang pagbantay sa airport kag mga port of entries subong man sa mga entry kag exit points sang syudad sang Roxas agud indi makasulod ang virus kag maproteksyunan ang kabuhi sang pumoluyo.
Nauna na nga ginmando sang alkalde ang pagsiguro nga indi makasulod nga wala makaagi sa quarantine procedures ang mga pasahero ukon turista nga may lagnat iukon anuman nga sintoma nga mahimu iangut sa coronavirus ilabi na ang mga nagikan sa China kag pungsod nga may kaso sang nCoV.
Paagi sa CAAP guinpatuman sang gobierno sang syudad ang nCoV preventive measures sa airport paagi sa pagpa-fill-up sang Health Declaration form sa pasahero ukon turista nga magahugpa sa Roxas City Airport. Igapatuman man ini sa kada pantalan kag terminal.
Magaserbe naman nga quarantine area ang Regional Evacuation Center sa Barangay Milibili, sining syudad sa tion nga may magpositibo samtang ginaplano naman sang syudad ang pagbakal sang thermal guns kag mga protectective gears nga mahimu nga magamit.
