ROXAS CITY – Dako nga pagpasalamat ang luyag nga ipalab-ot ni Mayor Receliste Tanoy Escolin sa mga pumuluyo nga padayon nga nagapati kag nagasalig sa iya pagserbisyo matapos ang kadalag-an sa pagka-alkalde sa banwa sang President Roxas.
Sa interview sang Bombo Radyo, suno diri nagalaum na ini nga liwat nga magadaug sa piniliay apang wala sini gina-ekspektar ang tuman ka dako nga boto nga nagdangat pa sa 11,331 kumparar sa mga kasumpong nga masobra 3,000 nga boto ang nakuha.
Nangin madinalag-on si Escolin, apisar may yara sang pagpakalain, pagpatalang kag isyu sang korapsyon nga ginahaboy sa iya kag sa iya pamilya bangud man sa wala tupong nga pagsuporta sang mga taga Pres. Roxas.
Nagapromisa ang alkalde nga maga-padayon ang nasuguran na nga mga proyekto, magahatag sang benepisyo sa mga pumuluyo, kasadyahan, pag-umwad agud makuha ang handum sini nga “total transformation” sa banwa sang President Roxas.
Samtang, ginpanginwala man sini ang alegasyon nga may yara sang vote buying sa iya nga partido kag nagapromisa nga magabulig sa gindakup nga persona nga pasakaan sang kaso nga Abduction and Illegal Detention ang responsable sa amo nga insidente.
