ROXAS CITY – Indi mahimo nga iturn-over sa karon sang alkalde sa mga benepisyaryo ang mga housing units sang National Housing Authority (NHA) sa Barangay Pangabuan, Jamindan, Capiz.
Ini bangud tuman pa ka-delikado para sa mga residente nga estaran ang nasambit nga mga balay.
Suno kay Mayor Mac Arthur Valdemar nga indi luwas para sa mga residente nga estaran ang mga housing units bangud masami ini nga ginabahaan kun tig-ululan.
Kalakip diri ang indi maayo nga pagconstruct kag paggamit sang mga substandard nga mga materyales.
Nahibaluan nga may yara sang kabug-osan nga 535 ka mga housing units nga gintukod ang National Housing Authority (NHA) para sa mga residente nga nagaestar sa mga danger zone kag malapit sa suba.
Ginpahayag ni Valdemar nga nakapadulong na ini sa main office sang NHA sa metro manila sa diin ginpalab-ot ang mga problema sang mga housing units.
Apang, dismayado ang alkalde bangud tubtob subong wala sa gihapon ini mahatagan sang solusyon sang NHA.
Matandaan sadtong 2016 sang gin-aprubahan ang nasambit nga proyekto sa diin ang contractor sa pagconstruct sang mga housing units amo ang Goldenville Realty Development Corp. kag ang ginkuha nga sub contractor amo si Manuel Erwin Jinon ang anak ni anay mayor Ethyl Jinon.
Nahibaluan nga tuig 2017 sang natigayon nga matapos ang nasambit nga proyekto.
