ROXAS CITY – Ginakwestyon sang pamilya sang menor de edad nga ginaalegar ginkuga sang isa ka poultry boy ang aksyon nga ginahimo sang Dumarao PNP agud masolbar ang ila kaso kag mapanabat ang may kahimuan sa pagpanakit sang ila himata.
Sa interview sang Bombo Radyo sa indi na paghingadlan nga iloy, suno diri natabo ang insidente sang bulan sang Oktubre sa diin nagpuli ang iya anak nagikan sa eskwelahan nga nagahilibion kag may bagras kag nagahubag ang liog tuga sang ginaalegar pagpangkuga sang poultry boy.
Mahibaluan, antes makapuli ang biktima malabayan sini ang poultry farm sa diin ginaalegar ginbangga-an ini sang poultry boy kag ginkuga.
Sa panaysayon sang iloy, ginreport na nila sa kapulisan ang hitabo apang pila na kabulan ang nanligad daw kasubong wala sa gihapon sang aksyon ang Dumarao PNP agud mapanabat ang ginaalegar nagsakit sa ila anak.
Suno diri, nagka-trauma na ang iya anak kag indi na luyag magkadto sa eskwelahan ukon magguwa sa balay sang naga-isahanon bangud sa kahadlok nga yara lang sa palibot ang nagsakit sa iya.
Dismayado ang iloy nga sa baylo ang Dumarao PNP ang magabulig kag magaprotekta sa ila batok sa malain sang tinutuyo, ginapahayag ang Dumarao PNP pa ang nagpabaya kag ginatugutan nga maglagaw sa lugar ang ginatudlo suspek sa pagpanakit sa menor de edad.
