ROXAS CITY – Naalarma ang pamunuan sang Capiz Provincial Health Office partikular sa mental health department sa nagasugod naman nga pagkabalhag sang suicide cases sa probinsya.
Ini ang ginpahayag ni Ms. Jasmin Galalza, mental health coordinator sang Capiz PHO sang mainterview sang Bombo Radyo.
Suno diri, base sa ila datos, nagtaas ang numero sang mga nag-utas sang ila kabuhi sang tuig 2021 nga may yara sang 38 ka mga kaso, ikumparar sa tuig 2020 nga may yara sang 29 ka mga kaso.
Ginakabig nga depresyon ang ginatudlo nga rason sang mga biktima sang suicide.
Bangud diri, nagapahanumdom ini sa mga indibidwal nga may mga problema ilabi na sa emosyonal nga aspeto nga indi magkahuya nga ipabutyag ini sa iban nga tawo.
Paalinton man sini sa mga tawo nga may kilala ukon may mahibaluan nga matawag stress ukon depress nga tawo nga mangin sensitibo sa pagpakig-istorya diri.
Dapat suno kay Gallaza nga magpamati sa gina-share sang isa ka persona nga may ‘suicidal thoughts’ kag dumilian ang pagmandu sang iya nagakadapat nga buhaton.
Importante man nga makahibalo ang isa ka tawo kun paano mag-deal sang stress, bangud indi ini malikawan sa pang-adlaw-adlaw nga pagpangabuhi, subong man kun paano magcope-up sang problema.
Mahimo nga magkontak sa numero 09219912064 kag 09162411596 para sa nagakinahanglan sang maka-istorya.
