TAPAZ, CAPIZ- Madinalag-on nga nadiskubre sang mga tropa sang 12th Infantry Battalion ang isa ka talaguan sang mga armas sang Communist Terrorist Group sa Barangay Tacayan, Tapaz, Capiz.
Sa interview sang Bombo Radyo kay Lieutenant Colonel Vicel Jan Garsuta, Commanding Officer sang 12IB, iya ginpahayag nga nagapatigayon sila sang operasyon matapoos nga nakakuha sang impormasyon nagikan sa isa ka anay nga myembro sang rebelde nga grupo.
Dugang pa sang opisyal nga isa ini ka pamatuod sang padayon nga kooperasyon sang mga anay rebelde kag mga pwersa sang gobyerno batok sa lokal nga terorismo.
Kalakip sa mga narekober sang militar sa operasyon ang isa (1) ka M16 rifle, tatlo (3) ka mga short steel magazines, mga bala, duwa (2) ka rifle grenades, isa (1) ka detonator para sa anti-personnel mine, tatlo (3) ka blasting caps, 50 metros nga wire, isa (1) ka holster kag isa ka (1) ka guba nga caliber .38 nga armas-luthang.
Hugot nga ginahatagan sang pagtamod ang amo nga kadalag-an ang padayon nga pagtutok sang Philippine Army sa pagpuhag sa mga nagkalabilin pa nga pwersa sang mga rebelde kag pagpabilin sang kalinong kag seguridad sa rehiyon.
Ginganyat man ni Garsutan ang mga nagkalabilin nga myembro nga magbalik na sa sabak sang gobyerno kag makigbahin sa mga programa sini sa pagpabilin sang kalinong kaangay sang Enhanced Comprehensive Local Integration Program (E-CLIP).
Interviewed by Bombo Francs Biñas
