Mga baboy sa Brgy. Tanza, Roxas City indi puwede ipaguwa halin sa ila barangay, samtang ginahulat ang resulta sang blood sample sa ASF – Brgy. Kgwd.

ROXAS CITY – Ginadumilian sa karon nga magpaguwa sang baboy (karne ukon buhi) nga magagikan sa Barangay Tanza, Roxas City.

Ini matapos nga ginahulat sa karon ang resulta sang ginpatigayon nga blood samples sa mga baboy nga ginadudahan naapektuhan sang African Swine Fever (ASF).

Sa interview sang Bombo Radyo kay Brgy. Kagawad Benny Camacho, ini sa karon ang ila ginapatuman nga tikang samtang nagahulat sang igapapanaog nga Executive Order ni Mayor Ronnie Dadivas.

Mahimo sila nga makapasulod sang baboy sa ila barangay basta may tatak ini nga nagikan sa slaughterhouse.

Apang sa iya pagkahibalo, nagpositibo na sa ASF ang baboy sa may bahin sang Sitio Dulunan, apang para sa opisyal nga pahibalo, ginatugyan nila ini sa City government.