Nagpanindugan ang assistant to counsel sang International Criminal Court (ICC) nga si Kristina Conti nga dapat pamatian anay ang tingog sang mga ginapahayag biktima sang drug war ni anay Presidente Rodrigo Duterte antes ini hatagan sang interim release.
Ang kampo sang anay presidente naghingyo nga hatagan sia sang temporaryo nga kahilwayan, nga kon maaprubahan, magatugot sa iya nga temporaryo nga makahalin sa ICC detention facility padulong sa wala gintumod nga pungsod.
Ginkumpirmar man sang ICC prosecutor ang ila ‘non-opposition’ sa hingyo sang anay presidente.
Ginpanindugan man ni Atty.Conti nga ang panan-awan sang mga biktima pareho ka importante sa kaugalingon nga panan-awan sang defense kag prosecution team, gani dapat pamatian ini anay sang international tribunal.
Ginpakamalaut man sang abogado ang pag-angkon sang defense team nga naka-istorya na sila sa prosekusyon kag sa tiglawas sang isa ka pungsod nga pabor sa pag-detain sa anay presidente kun mahatag ang request for an interim request.
Suno kay Conti, dapat anay ini kumpirmahon sang ICC bangud pareho nga self-serving ang amo nga mga pahayag, kag wala pa sang kasiguruhan kon bala ginhimo gid man ini.
Naghingyo ang abogado nga hatagan sang kahigayunan ang mga biktima sang drug war nga iya ginarepresentar nga magpahayag sang mga rason sang ila pagpamatok sa kaangay nga lihok.
Apisar sini, ginpasalig ni Conti nga posible nga mahatag ang hingyo sang kampo ni Duterte para sa interim release, wala ini nagakahulugan nga lubos na ini nga hilway bangud mangin istrikto sa gihapon ang ICC sa iya mga aksyon kaangay sang pag-istorya sa mga mamamahayag.
