ROXAS CITY – Liwat naman nga magapatigayon ang Capiz Environment and Natural Resources Office (CaPENRO) sang One in One Project ukon ang One Million Trees in One Day sa Hunyo 25, 2019.
Ini ang ginpahayag ni CaPENRO – Head Atty. Emilyn Depon sang mainterview sang Bombo Radyo Roxas.
Ang tree planting activity gintawag nga One in One Project kag gindeklara ni Governor Antonio del Rosario bilang Provincial Arbor Day ang adlaw sang June 25 kada tuig.
Tinutuyo sang aktibidad nga mag-isa ang mga Capizeño kag magbuligay agud maprotektahan ang palibot, mabalik ang forest covered kag mabatuan ang climate change.
Ginpahayag ni Depon nga base sa ila nga pag-monitor sa masobra isa ka milyon ka mga ginpangtanom sang nakaligad nga tuig sa kapareho nga aktibidad, 52 porsyento diri ang naka-survive ukon 595, 054 ka mga puno.
Sa karon suno kay Depon, padayon ang ila nga coordination meeting sa magkatuhay nga ahensiya sang gobyerno, stakeholders kag mga pribado nga grupo nga magaupod sa nasambit nga aktibidad.
