ROXAS CITY -Magahatag sang hazard-pay ang gobyerno-probinsiyal sang Capiz sa mga empleyado sini nga naga-trabaho kadungan sang ginapangatubang sa karon nga coronavirus disease (COVID-19) pandemic.
Ini ginpahayag ni Provincial Budget Officer Antonio Arbis sang mainterview sang Bombo Radyo.
Ginpahayag ni Arbis nga tanan nga casual kag regular nga empleyado sang gobyerno-probinsiyal nga nagtrabaho humalin sang bulan sang Marso 30 tubtob Abril 30 ang magabaton sang hazard pay.
Suno kay Arbis nga P300 kada adlaw ang mabaton sang kwalipikado nga empleyado.
Gindugang pa sini nga ang mga nurses kag mga doctors nga naka-assign sa mga COVID-19 patients ang magabaton man sang special risk allowance.
Mahibaluan nga kapin P17 milyones nga pondo ang ginpain sang gobyerno-probinsiyal para sa hazard pay sa mga empleyado kasunod sang mandu ni Presidente Rodrigo Duterte.
Natalana naman nga mabaton sang mga empleyado ang nasambit nga hazard pay subong nga semana.
