Nagapasalamat ang mga jeepney operators sa probinsya sang Capiz sa ₱2,000 nga ayuda nga ginahatag sang gobyerno sa idalom sang United Package for Livelihoods, Industry, Food, and Transport ukon UPLIFT Program para sa mga low-income earners nga na-apektuhan sang pagsaka sang presyo sang gatong.
Sa interview sang Bombo Radyo kay Mr. Jobert Carandang, Chairman sang Pagkakaisa ng mga Samahan ng Tsuper at Opereytor Nationwide ukon PISON-Capiz, iya ginpahayag nga makabulig ang nasambit nga ayuda sa mga tsuper kag operator, apang indi ini makaigo sa adlaw-adlaw nga panginahanglanon sang tagsa ka pamilya.
Suno kay Carandang, padayon nga nagasaka ang presyo sang mga balaklon bangud sa nagapadayon nga tensyon sa pila ka mga bahin sang kalibutan nga nagtuga sang pagsaka sang presyo sang produktong petrolyo.
Ang UPLIFT Program ginapangunahan sang Department of Social Welfare and Development ukon DSWD, kag koordinasyon sa iban pa nga mga ahensiya sang gobyerno, agud makahatag sang bulig pinansyal sa mga benepisyaryo nga naapektuhan sang mataas nga presyo sang gatong.
