ROXAS CITY – Nag-atubang -atubang sa mga hurado ang mga kandidata sang 67th Miss Universe sa Bangkok Thailand.
Ginpahayag ni Bombo International Correspondent Miss Cleo Rose Jondonero alas-7 sang gab-i oras sa Thailand kag alas-8 sang gab-I diri sa Pilipinas sang nagsugod ang closed-door interview sa mga kandidata.
Suno kay Jondonero isa sa ginabantayan sang kadamoan ang kandidata sang Pilipinas nga si Miss Catriona Elisa Gray.
Ini matapos nga nauna mag trending sa social media ang interview ni Gray sa Government owned Television Station sang Thailand nga PPTV HD 36 nga nakakuha sang masobra isa ka milyon nga views kag share sa sulod lamang sang tunga sa adlaw matapos nga ginpaguha.
Bangud diri, nakahimo sang manami nga imahe ang Miss Universe Philippines sa Thailand nga kun tawgon sang mga Thai isa sa pinakamaalam nga kandidata.
Nahibaluan nga tanan nga mga hurado ang mga kababainhan sa Miss Universe subong nga tuig sa diin ginatawag nila “The Power Women Around the World”
Sa inisyal nga impormasyon kalakip sa mga ini ang Filipino-American Fashion Designer nga si Monique Lhuiller kag si Richelle Louise Singson-Michael nga nangin host kag chairman sang 65th Miss Universe nga ginhiwat sa Pilipinas sadtong 2016.
Samtang, hiwaton karon sa gab-i ang preliminary competition nga ginalakipan sang Swimsuit kag Evening Gown Competition.
