ROXAS CITY – Posible nga magapangatubang sang penalidad kag mapasakaan sang kaso ang mga kandidato sa nagligad nga local kag national election subong nga tuig sa tion nga mapaslawan ang mga ini nga maka-file sang ila nga Statement of Contribution Expenditures (SOCE) sa Comelec.
Ini ang ginpahayag ni Atty. Wil Arceño, provincial election supervisor sang ma-interview sang Bombo Radyo.
Suno kay Arceño, nagasugod ang pag-file sang SOCE halin sa petsa kun san-o nag-umpisa ang campaign period.
Kun madumduman, nagsugod ang national campaign period sadtong Pebrero 8, 2022 samtang ang local campaign period naman ang nagsugod sadtong Marso 25, 2022.
Ginpahayag ni Arceño nga kinahanglan sang mga kandidato nga isumiter ang ila tanan nga nagasto sang sila ang nagapangampanya lakip na ang mga balor sang tarpaulin nga gin-donar sang ila mga abyan.
Magapatigayon naman sang imbestigasyon ang Comelec sa tion nga mag-sobra ukon magkulang ang kantidad nga gingasto sang mga kandidato bangud may yara sang layi nga ginasunod ang nasambit nga ahensya.
Ang deadline sa pagfile sang SOCE tubtob na gid lamang sa June 8 subong nga tuig kag indi na ini pagpalawigon pa.
