SIGMA, CAPIZ- Nagapadayon ang imbestigasyon sang mga kapulisan sang Sigma Municipal Police Station agud matumod ang persona nga yara sa likod sang bomb threat nga natabo sa Vicente Andaya Sr. National High School, Sigma, Capiz.
Sa interview sang Bombo Radyo kay Police Major Marvin Balmes, Hepe sang Sigma Municipal Police Station, iya ginpahayag nga sang tion mismo nga nagreport sa ila nga talatapan ang isa ka manunudlo natuhoy sa nasambit nga pagpamahog, gilayon nila nga ginpadulungan ang nasambit nga buluthuan.
Suno kay Balmes, sa ila nga pag-abot, yara na sa open field ang mga estudyante kag gin-istorya nila ang School Principal agud matumod kun sa diin naghalin ang nasambit nga pamahog.
Pahayag niya, sandig sa ila nga pagpangusisa, ginpahayag nga gin-chat ang isa ka estudyante sa diin nga nagasiling nga may gin-tanom nga bomba ang pila ka mga indibidwal.
Nagpatigayon naman sang assessment ang mga kapulisan sa diin nga ginlibot sini ang bilog nga eskwelahan kag gin-review ang mga CCTV Footages apang wala naman sang may nakita nga makaduluda.
Nahibaluan nga luwas naman nga nakapauli sa tagsa ka mga puluy-an ang tanan nga mga estudyante, manunudlo kag mga staff sang eskwelahan.
Ginadudahan sa subong sang mga kapulisan nga posible isa ini ka tawo nga wala sang may mahimuan sa kabuhi ang nagapamahog kag posible nga amo man ini ang nagpamahog sa iban pagid nga mga buluthuan sa probinsya.
Liwat nga nagpahanumdom ang natungdan sa publiko nga ang nasambit nga pagpamahog indi gid sang maayo kag may nagakaigo ini nga penalidad sa diin nga kun sa kwarta nagalab-ot sa P40,000 kag lima ka tuig nga pagkapreso sa sin-o man nga madakpan nga nagahimo sang kasubong nga pagpamahog.
Interviewed by Bombo Sunnie Mae Constantino Batencila
