ROXAS CITY – Hugot nga gina-tsekyar sang mga katapo sang Provincial Disaster Risk Reduction and Management Office (PDRRMO) ang mga rekisitos nga kinahanglanon para sa mga nagasulod nga mga indibidwal gikan sa Iloilo padulong sa probinsiya sang Capiz.
Sa paglibot kag pagpangusisa sang Bombo Radyo News Team sa Capiz-Iloilo border sa Barangay Aglalana, Dumarao, nahibaluan nga kun sa siyudad mismo sang Iloilo nagahalin ang isa ka persona, kinahanglan sini mag-presentar sang medical certificate, valid ID kag Letter of Acceptance agud makasulod sa probinsiya.
Para naman sa mga magahalin lamang sa mga kabanwahanan sa Iloilo province, kinahanglan lamang mag-presentar sang valid ID kag medical certificate.
Kun taga-Capiz ka naman kag magapadulong ka sa Iloilo, wala ka sang kinahanglan i-presentar agud makalusot sa Iloilo apang sa imo pagpauli may mga rekisitos na nga kinahanglan ma-presentar ilabi na kun madugay ini nga nagtenir sa Iloilo.
Kalakip sa kinahanglan nga rekisitos ang valid ID kag medical certificate.
Pag-abot naman sa mga public transport vehicles nga magasulod sa probinsya, kinahanglan nila magsumiter sang ‘passenger manifest’ sa border checkpoints, Vehicle Identification, lugar kun sa diin ini naghalin nga destinasyon, Date and time of departure from origin kag pila ka mga nagakaigo nga impormasyon.
Katuwang man sang PDRRMO sa pagpatuman sang hugot nga border restrictions ang hanay sang Philippine National Police kag Philippine Army.
