Nagpatuman ang Department of Trade and Industry (DTI) sang price freeze sa basic necessities sa mga lugar nga ginpaidalum sa state of calamity sa tunga sang pagpanglaslas sang bagyong Kristine.
Sa idalum sang Price Act, ginpatuman ang 60-day automatic price freeze sa tion nga ideklarar ang state of calamity.
Sakop sini ang mga produkto nga kaangay sang canned fish, locally manufactured instant noodles, bottled water, bread, processed milk, coffee, candles, laundry soap, detergent, kag salt.
Mahibaluan nga ang Albay ginpaidalum sa state of calamity sadtong Martes bangud sa padayon nga pag-inulan nga nagresulta sa mga pagbaha kag landslides sa vulnerable areas.
Subong man ang Magpet town sa Cotabato.
Pahayag sang ahensya nga kung sin-o man ang maglapas sa price freeze, magapangatubang sa pagkapreso sang isa tubtob 10 ka tuig ukon may penalidad nga P5,000 tubtob P1 million, depende sa mangin desisyon sang korte.
Bangud sini, ginganyat sang DTI ang mga consumer nga i-report ang retailers, distributors, kag manufacturers nga nagabaligya sang mas mataas sa regular nga presyo.
