Pagabayaran sang gobyerno ang mga maapektuhan nga propedad kag pamalay sa pagahimuon nga expansion sang Roxas City Airport.
Suno kay Kagawad Cesar Ibañez sang Brgy. Baybay, sa ginpatigayon nga pagsinapol sang Civil Aviation Authority of the Philippines (CAAP) kaupod ang mga barangay officials, ginpatawag ang mga residente kag mga nagapanag-iya sang propedad sa area nga maigo sang airport expansion.
Ginpaathag suno diri sang CAAP ang mga development nga igahatag sa syudad sang Roxas kun sa diin amo ang pagpalapad sang Roxas City Airport nga basehan agud madala ini bilang international airport.
Wala man suno diri namensyonar sa pagsinapol kun san-o magasugod ang amo nga proyekto apang ginpasiguro sang CAAP nga madayon ini.
Matandaan nga sadtong bulan sang Mayo sini nga tuig ginbisita sang Manager sang Civil Aviation Authority of the Philippines (CAAP) ang probinsya sang Capiz may kaangtanan sa pagpanami sang Roxas City Airport.
Ginpresentar sang CAAP sa Roxas City LGU ang development projects sa sa nasambit nga airport kasubong sang pagpalapad sang runway, expansion sang apron, konstruksyon sang airport tower, passenger terminal, pagpalapad sang parking space kag iban pa nga kinahanglan agud makahatag sang mas dekalidad nga serbisyo, manami kag malapad nga espasyo para sa mga pasahero.
