ROXAS CITY – Ginkaalarma sang mga manugbaligya sa Teodoro Arcenas Trade Center (TATC) partikular na sa fish kag meat section ang liwat nga pagtuhaw sang mga peke nga kuwarta nga ginahimo pangbayad sa ila mga baligya.
Ini ang matapos nga duha ka mga vendor ang nabiktima sang peke nga kuwarta subong nga adlaw.
Sa interview sang Bombo Radyo kay Henry Concepcion, biktima suno diri wala sini natalupangdan nga peke na ang ginbayad sa iya bangud sa kasakuon kag madamo na siya sang kustomer sa tion sang insidente.
Suno diri, nagbakal ang isa ka persona sang 1 ka kilo nga tilapia nga nagabalor sang P150 kun sa diin ginhatagan siya sang P1,000 cash kag gilayon man niya nga ginsinsilyuhan sang P850.
Apang, ginkatingala na lamang ni Concepcion nga amat-amat na nga nagakapud-pod ang P1,000 bill kag madasig nga magisi.
Wala nagalaum si Concepcion nga matabo sa iya ang insidente bangud madugay na ini nga nagabaligya kag ini ang labing una nga kahigayunan nga na biktima siya sang peke nga kuwarta.
Panugyan sini sa mga kapareho nga mga vendor nga mangin alerto kag bantayan ang hulag sang mga bumalakal agud madakpan ang mga luyag nga mangtunto sa ila isigkatawo.
Nagapati naman si Concepcion nga pangayaw ang yara sa likod sang pagpanunto.
