Nagtimbuok sa 150 ang numero sang mga na-report nga napatay bangud sa paglaslas sang Bagyo Kristine sa pungsod.
Sa pinakaulihi nga report sang National Disaster Risk Reduction and Management Council (NDRRMC), 14 pa lamang sa nabalhag nga casualties ang validated.
Nalista man ang 115 nga nagkalapilasan kag 29 ang missing.
Samtang, masobra 1.8 milyon pamilya ukon kabaylo sang masobra 7.4 milyon nga indibidwal ang apektado sang bagyo nagikan sa 10,921 nga mga barangay sa Region 1 (Ilocos Region) Region 2 (Cagayan Valley), Region 3 (Central Luzon) CALABARZON, MIMAROPA, Region 5 (Bicol) Region 6 (Western Visayas) Region 7 (Central Visayas) Region 8 (Eastern Visayas) Region 9 (Zamboanga Peninsula) Region 10 (Northern Mindanao) Region 11 (Davao Region) Region 12 (SOCCSKSARGEN) CARAGA, BARMM, CAR kag NCR.
Sa nasambit nga numero masobra 330,000 nga indibidwal sa gihapon ang temporayo nga nagatinir sa 2,081 evacuation centers sa pungsod.
Sa karon, nagtaas pa sa 211 nga syudad kag munisipalidad ang yara sa idalom sang State of Calamity.
Kaangut sini, yara na sa ₱900 milyon ang balor sang bulig nga napanagtag sang gobyerno sa mga apektado nga residente nga ginakalakipan sang family food packs, bayo, bulong kag madamo pa nga iban.
