Naglab-ot na sa 17 ka persona ang napatay bangud sa mga vehicular accident sa probinsya sang Capiz halin Enero 1 tubtob Hunyo 11, 2025.
Sa interview sang Bombo Radyo kay Police Captain Merry Chris Dela Cruz, Public Information Officer sang Capiz Police Provincial Office (CPPO), ginpahayag niya nga ang bulan sang Abril ang may pinakamataas nga kaso sang napatay nga nagdangat sa lima (5). Sunod sini amo ang Enero nga may apat (4), Mayo – tatlo (3), samtang tigduha sa Marso kag Hunyo, kag isa naman sa Pebrero. Suno kay Dela Cruz nga ang syudad sang Roxas kag banwa sang Ivisan ang may pinakamadamo nga kaso sang aksidente nga naglab-ot sa apat (4).
Dugang pa sang natungdan, naglab-ot na sa 687 ka vehicular accident ang nabalhag sa bilog nga probinsya sang Capiz sa sulod sang unom ka bulan.
Ginpahayag ni PCAPT Dela Cruz nga ang mga kabangdanan sang aksidente amo ang kakulangan sang pila ka motorista sa edukasyon sa husto nga pagmaneho, malain nga kondisyon sang karsada ilabi na kung ini yara sa ‘under construction’ ukon kun may ulan, kag yara sa impluwensya sang makahulubog nga ilimnon ang pila ka mga driver nga naulamid sa aksidente.
Nagapanawagan ang kapulisan sa publiko nga mangin responsable sa pagmaneho agud malikawan ang disgrasya
