ROXAS CITY – Nagapanawagan ang mga pamilya nga nadulaan sang pangabuy-anan kadungan sang pagsuspendi sang gobernador sang Capiz sang quarry sa bug-os nga probinsya nga ibalik na ang nasambit nga operasyon.
Sa pakig-angut sang Bombo Radyo kay alyas “Rose”, sang Barangay Balatucan banwa sang Panitan bangud nasuspendi ang operasyon nadulaan na sang pangabuhian ang iya bana agud ma sustenir pakaon ang ila pamilya.
Pahayag sini nga bangud sa trabaho sang iya bana, nakakaon sila sang kabataan sang tatlo ka beses sa isa ka adlaw apang subong imposible na ini bangud ginakabos na sa kwarta kag nagtaas pa ang presyo sang mga balaklon.
Mahibaluan nga alas 12:00 pa lang sang maga-aga nagabugtaw na ang iya bana para magtrabaho kag magkuha sang balas tubtob alas 9:00 sang aga.
Suno diri, masobra 200 ka mga pamilya ang apektado sa nangin tikang sang gobyerno probinsyal kag ini ang una nga kahigayunan nga may nagsuspendi sa nasambit nga operasyon.
Dugang pa sini, nga naghinyu na ini sang bulig sa ila nga Barangay kag nagahulat na lang sang rekomendasyon.
Matandaan nga nagpapanaug sang executive order si Governor Fredenil “Oto” Castro sang Hulyo 11, 2022 nga nagasuspendi sa operasyon sang quarry bangud sa pagbayular sang mga permit holders kag kakulangan sang permit.
