ROXAS CITY – Ginatos ka mga Pinoy gikan sa nagkalain-lain nga nasyon sa Middle East ang ginpaiway ang ila nga trabaho agud magtambong sa makasaysayan nga misa nga pagapangunahan ni Pope Francis sa Zayed Sports City, Abu Dhabi sa United Arab Emirates subong nga adlaw sang Martes.
Sa interview sang Bombo Radyo Roxas kay Bombo International Correspondent Soledad Frondoza, ginpahayag sini nga nagakalangkag na ang mga Pinoy nga makit-an kag makaatubang ang pinuno sang Simbahang Katoliko Romano.
Ginalauman nga pagatambungan ang nasambit nga misa ni Pope Francis sang kapin 120, 000 ka mga tawo gikan sa nagkalain-lain nga nasyon.
Mahibaluan nga may yara sang live-streaming sang Papal Mass sa tanan nga mga catholic churches sa Middle East.
Ang tatlo ka adlaw nga biyahe sang Santo Papa ang labing una niya nga papal visit sa Arabian Peninsula, kun sa diin nagtubo ang relihiyon nga Islam.
Mahibaluan nga kahapon, nagbisita ang Santo Papa sa Grand Mosque kag nagpakigsapil sa mga miyembro sang Muslim Council of Elders nga ginsundan sang International Interfaith Meeting sa Founder’s Memorial.
