ROXAS CITY – Pamulitika ang posible nga rason nga ginapanan-aw sang mga pumuluyo matapos nga wala makabaton sa ika-apat nga hugnat sang tagtaganay sang bugas nagikan sa city government, sa Barangay Mongpong, syudad sang Roxas, sang Abril 26.
Sa pakig-angut sang Bombo Radyo kay brgy secretary Cecilia Artillero, nakabati na ini sang istorya nga indi na makabaton sang bugas ang mga identified nga nagasuporta sa pulahan kag nakumpirmar lamang ini sang pag-abot sang adlaw sang tagtaganay nga wala na sini ang pangalan sa listahan.
Suno diri, klarado nga ginkakas ang iya pangalan bangud indi man lipod sa ila ihibalo sang tanan, nga naga-suporta ini sa team pulahan.
Samtang, dako naman ang palamangkutanon ni Nanay Claudia nga wala ini nakabaton sang bugas bangud wala pa ini sang may ginadampigan nga kandidato sa eleksyon.
Nagahinyo naman ini nga indi paglamudan sang pamulitika ang pagpanagtag sang bugas bangud nagapati ini nga kwarta sang pumuluyo ang ginagamit kag indi kwarta sang bisan sin-o nga alkalde.
Dugang pa sini nga ihatag ang para sa mga pumuluyo kag indi pagpilion ang paga-hatagan.
Nagapanindugan naman si Anna Cortal, Barangay Health Worker, nga nagasunod lamang ini sa mandu sa ila kag wala sini nahibaluan ang rason kun nga’a wala nakabaton sang bugas ang pila ka mga pumuluyo sa amo nga barangay.
