ROXAS CITY – Naghimo sang tikang ang punong barangay sang Barangay Baybay sining siyudad agud matapna ang pagduging sang mga tawo nga nagapadulong sa Roxas City Peoples Park nga wala nagasunod sa mg health protocols nga ginapatuman sa probinsiya.
Sa pagpakig-angut sang Bombo Radyo kay Punong Barangay Rey Magallanes ginpahayag sini nga temporaryo nga untaton ang pagbaligya sang mga vendors sa nasambit nga lugar kag pagpatigayon sang Zumba sa lunes nga adlaw.
Aminado si Magallanes nga may yara sang mga vendors nga nagalapas man sa mga health protocols.
Sa mga nagapatigayon naman sang Zumba, ginpahayag sang opisyal nga may yara sang wala nagasuksuk sang facemask pagkatapos sang ila nga zumba.
Magluwas diri, nagapakuha pa sila sang mga laragway nga tingub ukon magkaupod.
Ginpanindugan ni Magallanes nga indi sa tanan nga oras makabantay ang mga BPATs bangud may yara man sila sang tagsa ka mga obligasyon.
Natalana naman nga magpatawag sang sinapol si Magallanes sa mga natungdan agud liwat ipaintiendi sa ila ang ginapatuman ng mga health protocols.
