ROXAS CITY – Na-Wow mali ang 61st Infantry Battallion sang Philippine Army kag Regional Intelligence Division sang Police Regional Office 6 sa pag-aresto kay Baltazar Saldo sang Sto. Angel, Dumalag, Capiz kag pagserbe sang apat nga warrants of arrest sa 2 ka kaso nga murder kag 2 ka kaso sang attempted murder sa Poblacion Tacas, Cuartero, Capiz sang nagligad nga Domingo nga adlaw.
Nagpanindugan ang mga otoridad nga si Saldo amo si Virgilio Paragan, commanding officer sang Roger Mahinay Command, Komiteng rehiyon-Negros ng Communist Party of the Philippines-New People’s Army (CPP-NPA) sang 2000 tobtob 2004.
Apang sa ginpatigayon nga validation napamatud-an nga biktima lamang sang mistaken identity si Saldo.
Nagaguwa man nga isa ka ordinaryo nga driver lamang si Saldo nga nasal-an nga anay commanding officer sang rebelde nga grupo nga madugay na nga ginapangita sang kasuguan.
Nahibaluan nga mismo ang hinablos sang rebelde nga si Paragan ang nagpanindugan nga indi ang nadakpan nga si Saldo ang tiyo nga si Virgilio Paragan.
